A Way of the Cross in a time of Pandemic

Ginoo Jesucristo, ha amon pagsulsog upod ha imo han Dalan han Kros, buligi kami hin pagsantop han kahulugan han imo mga kasakitan para han amon yana makuri nga kahimtang samtang nag-aantos kami hin damo nga kakurian tungod hini nga peste.  An imo kros aada ha butnga han kasaysayan, nalandaw nga tigaman nga an Dyos nga naghimo han amon kalibutan tungod hin gugma nakakasabot han amon mga kasakitan ngan naangbit ngahaw hini nga amon kakurian.  Amen.

Syahan nga Estasyon:
Hi Jesus ginhukman ha kamatayon ni Pilato

Maguruna :  Nagsisingba ug nagdadayeg kami ha imo, Ginoo.
Baton : Kay tungod han imo santa kros ug pagkabanhaw gintubos mo an kalibutan.

Ha kadali, daw tatalwason na ni Pilato hi Jesus.  Nagpakita hiya nga bangin gud man.  Kundi ha katapustapusan, nakita naton an hinbabaroan na ni Jesus:  waray katalwasan dinhi ha kalibutan.  Adton mga tawo nga nagdadayaw ha iya pira pala ka adlaw an naglabay amo ngahaw an nan-gugugliat yana: “Igraysang hiya!”  Ginbayaan hiya han iya mga kasangkayan.  An kalibutanon nga gahum, kanay tinaglawas amo hi Pilato, magpipili han mga gin-aaro han mga nan-gugugliat nga mga tawo, diri lugod han kaangayan.

Pagampo:

Ginoo Jesucristo, ini nga peste nagtutdo ha amon han pagturon-an nga hadto pa namon hinbaroan: Mahusay ug marisyo an kalibutan, kundi napukan (tungod kan Satan) ug makaharadlok.   Mahibaro unta kami tikang ha imo nga mayda gud la uusa nga diri gud napakyas:  an Dyos ngahaw.  Amen.

Amay Namon . . .
Maaram kami nga bisan ano an mahitabo, masarig an amon kabubuwason dida han imo mga kamot.

Ikaduha nga Estasyon:
Ginkarawat ni Jesus an kros

Maguruna :  Nagsisingba ug nagdadayeg kami ha imo, Ginoo.
Baton : Kay tungod han imo santa kros ug pagkabanhaw gintubos mo an kalibutan.

Hul-os nga nagtubyan hi Jesus han iya kalugaringon ngada han kaburot’on han Amay; sanglit, han paghatagi ha iya hin mabug-at nga kros nga iya papas-anon tubtob han iya kamatayon, iya ini gin-angkon.  Ha iba nga pagladawan, ginhadkan pa ngani niya ini nga kros.  Maaram hiya nga an kros nangangahulugan hin kasakitan, kakurian ug kamatayon, kundi tumapod hiya han Amay ngan maaram hiya nga an Dyos nagdadara hin kaupayan tikang han bisan ano nga maraot, bisan hin sugad ka maraot han kros.

Pagampo:

Ginoo Jesucristo, an peste usa nga kros nga makuri karawaton. Hino man an masasakit? Hino an mamamatay? Hino an mawawarayan hin trabaho? Uunanhon man namon pagplano han amon kabubuwason?  Waray lain nga paagi kundi an pagtapod, sugad han imo pagtapod han waray pagpapas nga panimangno han Amay.  Hatagi kami hini nga pagtapod!  Amen.

Amay Namon . . .
Maaram kami nga bisan ano an mahitabo, masarig an amon kabubuwason dida han imo mga kamot.

Ikatulo nga Estasyon:
An Syahan nga Paghiparakop ni Jesus

Maguruna :  Nagsisingba ug nagdadayeg kami ha imo, Ginoo.
Baton : Kay tungod han imo santa kros ug pagkabanhaw gintubos mo an kalibutan.

Hi Jesus natumbahan han kabug-at han kros – ha ubos han kabug-at han aton mga sala – ngan nangingirhat kita pagkita hini.  Nagbabasol kita tungod han aton mga ginbuhat nga nagresulta hini.  Syahan, nagbabasol kita han aton mga gawi hin pagpalabi-labi ug pagkahakog.  Nag-ukoy kita hin masayonay nga kinabuhi nga puno hin kamaki-kalugaringon.  Nagpapakautang ngani kita basi maglipay la an aton kalugaringon ngan basi mamarayaw imbis nga magtirok para han tidaron.  Ha butnga han aton kinabuhi ginbubutang naton in iba nga mga diyos-diyos, diri an uusa la nga Dyos.

Pagampo:

Ginoo Jesucristo, diri ikaw an hinungdan han kasakitan, kundi natugot ka hini tungod kay dida han imo gahum ug kalooy, makakahatag ka hin kaupayan tikang ha kasakitan.  Buligi kami hin paghinumdum yana nga panahon han peste, nga diri kami an butnga han kalibutan.  Ikaw la an butnga.  Nagbabasul kami han amon pagpalabilabi ug kahakog.   Itubyan unta namon an amon panahon, paningkamot ug mga hiagi ngada kun hain an amon kasingkasing, ngada ngahaw ha imo.  Amen.

Amay Namon . . .
Maaram kami nga bisan ano an mahitabo, masarig an amon kabubuwason dida han imo mga kamot.

Ikaupat nga Estasyon:
Iginkatapo hi Jesus kan iya nanay

Maguruna :  Nagsisingba ug nagdadayeg kami ha imo, Ginoo.
Baton : Kay tungod han imo santa kros ug pagkabanhaw gintubos mo an kalibutan.

Aadi hi Jesus, naatubang han iya nanay.  Han pulahay pa hiya, ginsumatan an iya nanay nga lalagbasan hin espada an iya kasingkasing.  Dida han nabitay hiya ha kros, hi Jesus nagtubyan ha iya basi magin aton liwat nanay.  Tikang han kabata ngadto han pagraysangan ha iya, maglalakat hiya ha makuri nga dalan kaupod an iya anak.  Kundi ha ira pagsiplatay, an ira paghigugmaay hilarum ug matam-is kaupay ngan an ira igkasi-kasakitan daw nangalimtan.

Pagampo:

Ginoo Jesucristo, kun hadto diri pa kami maaran, ini nga peste nagpapasabot ha amon yana han hinbabaroan na nga daan han imo nanay:  Ini nga kalibutan “walog nga luhaan.”  Salamat han imo upa – han imo nanay, ngan salamat han imo kamatinumanon ug han mahigugmaon nga panginano ha amon nga iya gindadara ngada ha imo. Amen.

Amay Namon . . .
Maaram kami nga bisan ano an mahitabo, masarig an amon kabubuwason dida han imo mga kamot.

Ikalima nga Estasyon:
Ginbuligan ni Simon Cireneo hi Jesus ha pagpas-an han kros

Maguruna :  Nagsisingba ug nagdadayeg kami ha imo, Ginoo.
Baton : Kay tungod han imo santa kros ug pagkabanhaw gintubos mo an kalibutan.

Usa nga lumalabay, hi Simon Cireneo, ginpirit han mga Romano hin pagbulig kan Jesus pagpas-an han kros.  Nagtitigaman hiya han mga lawasnon nga buhat ha kalooy, ha pagpanimangno han mga kinahanglanon han iba:  pagpakaon han mga ginugutom, pagpanapton han mga lubas, pagpainom han mga inuuhaw, pagpasirong han mga waray balay, paglubong han mga minatay –  labaw han ngatanan yana, an pagduaw han mga binilanggo (ug an diri nagpapakagawas), ug an pagduaw han mga magsakit.

Pagampo:

Ginoo Jesucristo, ipakita ha amon an mga higayon hin pagbulig han mga nagkukuri tungod hini nga peste.  Usahay, sugad kan Simon, waray kami lain nga mahihimo kundi bumulig nala.  Usahay kakadtoon namon an mga nanginginhanglan han amon bulig.  Ipadara kami, usa nga hugpo hin mga Simon, hin pagpagaan han mga inaabat han mga binubug-atan dinhi ha amon dapit.  Amen.

Amay Namon . . .
Maaram kami nga bisan ano an mahitabo, masarig an amon kabubuwason dida han imo mga kamot.

Ikaunom nga Estasyon:
Ginpahiran ni Veronica an bayhon ni Jesus

Maguruna :  Nagsisingba ug nagdadayeg kami ha imo, Ginoo.
Baton : Kay tungod han imo santa kros ug pagkabanhaw gintubos mo an kalibutan.

Waray pakigbali han mga bantay nga mga Romano, gindaop ni Veronica hi Jesus; iya ginpahiran an bayhon ni Jesus han iya panyo, ngan dida ngahaw nahipatik an ladawan ni Jesus.  Hi Veronica nagtitigaman han mga espirituhanon nga mga buhat ha kalooy:  pagtutdo han mga burong, pagwaydong han mga magpakasasala, pagpasaylo han mga sala, pagsagdon han mga nagruruhaduha, pagkarawat nga mananong han mga pakaraot – ngan labaw han ngatanan, an paglipay han magbidoon ug an pagampo tungod han mga buhi ug mga patay.

Pagampo:

Ginoo Jesucristo, kun napakadto kami han mga nagkukuri, an amon mga panlimbasog nagpapabalik han imo ladawan ngada han iba, ngan nahipapatik an imo bayhon ha amon kinabuhi.  Hatagi kami han mga pulong nga pagkikinahanglanon namon basi katagan hin pagtoo an mga nahahadlok ngan paglaum an mga nasusubo.  Amen.

Amay Namon . . .
Maaram kami nga bisan ano an mahitabo, masarig an amon kabubuwason dida han imo mga kamot.

Ikapito nga Estasyon:
An ikaduha nga paghiparakop ni Jesus

Maguruna :  Nagsisingba ug nagdadayeg kami ha imo, Ginoo.
Baton : Kay tungod han imo santa kros ug pagkabanhaw gintubos mo an kalibutan.

An ka bug-at han aton mga sala nagludlud na liwat kan Jesus ngada han tuna. An nagpatumba na liwat ha iya yana amo an aton mga sala hin kasina ug kaawa.  Sugad han mga tawo nga anay nalipay kundi ha urhi waray na ganahi kan Jesus, tumugot la kita ngahaw nga magin taphaw la, hababaw la, naugsong han kasinahon han mga tawo nga aton inaayonan, ngan nagsasalikway han pagkatawo ngahaw hadton diri naton inuuyonan.  Daw ginpriso naton an aton mga kalugaringon ha sulod hin mga bungbong nga salaming diin an aton nakikit’an an aton la ngahaw kalugaringon nga dagway, kay diri naman nakakasulod an kamatuoran.

Pagampo:

Ginoo Jesucristo, kinahanglan magkaada hini nga peste basi mahinumdom kami nga tinuha mo la kami ngatanan, nanlilimbasog hin pamiling han amon dalan dinhi ha kalibutan.  Nagbabasol kami han amon nga gawi hin kasina ug kaawa.  Tutdoi kami hin pagkilala han dignidad han tagsatagsa nga amon ginkakatapo, ngan hin pagpamati ug pagbaton inupdan hin paghigugma han ira mga kinahanglanon ha kinabuhi.  Amen.

Amay Namon . . .
Maaram kami nga bisan ano an mahitabo, masarig an amon kabubuwason dida han imo mga kamot.

Ikawalo nga Estasyon:
Iginkatapo hi Jesus han kababayen-an han Jerusalem

Maguruna :  Nagsisingba ug nagdadayeg kami ha imo, Ginoo.
Baton : Kay tungod han imo santa kros ug pagkabanhaw gintubos mo an kalibutan.

Hi Jesus naatubang hin hugpo hin kababayen’an nga nagtitinangis ha kasubo tungod han nahitabo ha iya.  Kundi nagsering hiya ha ira, “Ayaw pagtangis tungod ha akon, kundi tungod han iyo kalugaringon ug han iyo mga anak.”  An gidadakoi nga trahedya han mga pagsakita kan Jesus diri an kasakitan nga iya gin-antos kundi an ka diri pagkarawat han damo nga mga tawo han iya hatag nga katalwasan nga amo gayud an hinungdan han iya kasubo.

Pagampo:

Ginoo Jesucristo, buligi kami hin pagkita nga ini nga peste diri la usa nga trahedya han tawhanon nga kasakitan, kundi trahedya han mga kalag han tawo.  Buligi kami hin pagtangis diri la tungod han kakurian nga ginaatubang han kalibutan, kundi tungod han mga sala nga ginbubuhat han kalibutan.  Ginhahalad namon an waray lain nga kalipay nga imo ngahaw karuyag:  an amon mga kinabuhi nga iginhalad balik ngada ha imo.  Amen.

Amay Namon . . .
Maaram kami nga bisan ano an mahitabo, masarig an amon kabubuwason dida han imo mga kamot.

Ikasiyam nga Estasyon:
An ikatulo nga paghiparakop ni Jesus

Maguruna :  Nagsisingba ug nagdadayeg kami ha imo, Ginoo.
Baton : Kay tungod han imo santa kros ug pagkabanhaw gintubos mo an kalibutan.

Bisan kun harani na an iya kakadtoan, nahiparakop na liwat makausa pa hi Jesus.  Dida hini nga higayon, natumba hiya tungod han aton mga kasal’anan han kahubya ug kamakimalaw-ay.  Nagkukuri na hiya hin pagkadto ha Kalbaryo tungod ha aton, kundi diri kita nabulig bisan na man hin guti para ha iya.  Nagtatawag hiya ha aton ngada hin pagkabayani; kundi an karuyag naton an masayunay la.  Ginhalad niya an iya lawas ngadto han Amay; kundi ginlilipay naton an aton la mga lawas.  Nangingirhat kita nga namatay hiya tungod ngahaw han mga tawo kanay mga lawas aton la gin-gamit basi kita maglipay.

Pagampo:

Ginoo Jesucristo, tungod hini nga peste, nagbabasol kami han amon kahubya ug kamakimalaw-ay.  Sugad nga an iba ha amon nag-aantos hin sakit, makuri nga pagpakabuhi, ug kamatayon, hatagi kami hin kaputli ha kasingkasing basi kumita kami han kabirilhon han tagsatagsa nga amon ginkakatapo, basi magbasul han amon mga naglabay nga sala, ngan basi magpasidungog ug magpanalipod han imo ladawan dida ha amon mga igkasitawo.  Amen.

Amay Namon . . .
Maaram kami nga bisan ano an mahitabo, masarig an amon kabubuwason dida han imo mga kamot.

Ikanapulo nga Estasyon:
Ginlubasan hi Jesus han iya bado

Maguruna :  Nagsisingba ug nagdadayeg kami ha imo, Ginoo.
Baton : Kay tungod han imo santa kros ug pagkabanhaw gintubos mo an kalibutan.

Hi Jesus binalik ngadto han Amay sugad han iya ngahaw pagkanhi ha kalibutan.  Waray hiya marahalon nga mga panapton, waray harangdon nga dungog – ginlubasan hiya ha atubangan han Dyos ug tawo, nga waray bisan ano nga natabon han mga samad ug kasakitan, ngan nagpapakita ha bug-os nga kalibutan nga bisan hiya, hi Jesucristo, tinuod nga Dyos, tinuod liwat hiya nga tawo.  Usa hiya ha aton.

Pagampo:

Ginoo Jesucristo, ini nga peste nagtangtang han mga nakakalipat ha amon.  Sugad kami han “Emperador nga Waray Panapton” dida han susumaton nga naparayaw ug diri nakikigbali han amon tinuod nga kahimtang, naghuhunahuna nga diri gud kami maaalohan.  Makatuon unta kami dida ha imo hin pagkita han amon kalugaringon upod an pagkamapaubsanon ug pagkamatinud-anon, ginlubsan han daan nga mga gintutuohan, ngan hin pagkilala nga an amon tinuod nga balor waray lain kundi nga ginhihigugma kami hin usa nga gamhanan sugad ha imo.  Amen.

Amay Namon . . .
Maaram kami nga bisan ano an mahitabo, masarig an amon kabubuwason dida han imo mga kamot.

Ikanapulo kag usa nga Estasyon:
Ginraysang hi Jesus ha kros

Maguruna :  Nagsisingba ug nagdadayeg kami ha imo, Ginoo.
Baton : Kay tungod han imo santa kros ug pagkabanhaw gintubos mo an kalibutan.

Amo ini an katapusan nga pagpakurii han gamhanan nga hadi:  Gin-unat an iya lawas basi igraysang ha kros.  An mga palad han kamot nga naghimo han kalibutan nagunit nala han mga ulo-ulo han raysang.  Tikang han mga tiil nga naglakat ha tubig inawas in dugo ngada han kahoy.

Pagampo:

Ginoo Jesucristo, ini nga peste naghatag ha amon hin pag-abat nga waray kami mahihimo ha atubangan han makangingirhat nga kamaturoan han mga pag-antos ug kasakitan.  Waray kami mahihimo ha paglikay han kasakitan nga abot-kiabot, nahiraraysang ha kros han panhitabo.  Kundi, ha panahon nga waray na kami mahihimo, aada ka nga nahangkop ha amon.  Amen.

Amay Namon . . .
Maaram kami nga bisan ano an mahitabo, masarig an amon kabubuwason dida han imo mga kamot.

Ikanapulo kag duha nga Estasyon:
Namatay hi Jesus ha kros

Maguruna :  Nagsisingba ug nagdadayeg kami ha imo, Ginoo.
Baton : Kay tungod han imo santa kros ug pagkabanhaw gintubos mo an kalibutan.

Ngan nahitabo na.  An waray paghuhunahunaa.  An katapusan nga mga pangaraba ha kakurian, an pagtubyan han iya espiritu ngada han Dyos; ngan an makagarahum nga labaw nga nagyakan hin magnamit nga mga pulong nagmingaw ug nahiraraptay.  Patay na an hadi.  Amo ini an gidadakoi nga kahadlok nga aton mahuhunahunaan, ngan tinuod man gud:  hi Jesucristo, an ikaduha nga Persona han Santisima Trinidad, namatay ha kros.

Pagampo:

Ginoo Jesucristo, waray ha amon in maaram han amon kabubuwason tungod hini nga peste.  Nahadlok kami han gimamarauti .  Nahadlok kami han kamatayon. Ngan para han iba ha amon, ito nga kahadlok mahitatabo man ta.  Kundi nag-antos ka gihapon hini ngahaw nga amon gidadakoi nga ginkakahadlokan basi tagan nimo kami hin kusog ug paglaum nga bisan imo kami tawagon ngadto, aadto ka naghuhulat ha amon, puno hin paghigugma.  Amen.

Amay Namon . . .
Maaram kami nga bisan ano an mahitabo, masarig an amon kabubuwason dida han imo mga kamot.

Ikanapulo kag tulo nga Estasyon:
Gintanggal hi Jesus ha kros

Maguruna :  Nagsisingba ug nagdadayeg kami ha imo, Ginoo.
Baton : Kay tungod han imo santa kros ug pagkabanhaw gintubos mo an kalibutan.

An kasakitan natapos gihapon dida han paghatag ni Jesucristo han hingpit nga suklanan han paghigugma.  Ginpas-an niya an kabug-at, gindinusoduso ug gin-inuyan-uyan ngan gindanas tubtob han iya kamatay.  Didto, han katapusan han dalan, an iya lawasnon nga kinabuhi naawat dida ngahaw han gintikangan hito, dida han mahigugmaon nga pagkugos han iya nanay.

Pagampo:

Ginoo Jesucristo, hirayo pa an amon aagian dida hini nga peste.  Pagsusulsugon namon ini nga dalan tubtob ha katapusan ngan bisan kun diri kami maaran kun ano an mahitatabo ha un’han, paglalak’ton namon ito puno hin pagtoo ngan diri kami mabaya, tungod kay maaram kami nga ngatanan nga dalan nagtitipakadto ha imo.  Amen.

Amay Namon . . .
Maaram kami nga bisan ano an mahitabo, masarig an amon kabubuwason dida han imo mga kamot.

Ikanapulo kag upat nga Estayon:
Ginlubong hi Jesus

Maguruna :  Nagsisingba ug nagdadayeg kami ha imo, Ginoo.
Baton : Kay tungod han imo santa kros ug pagkabanhaw gintubos mo an kalibutan.

Ha katapusan, hi Jesus ginlubong ha lungib, ngan ginsadhan hin dako nga bato.  Ginbayaan hiya basi madunot.  Kaurogan, sugad hito an ginbubuhat han kalibutan.  Gintatago hi Jesus, trangkado ha katilingban, ngan ginsalikway an iya gugma.  Kundi diri nadudunot an Ginoo ha sulod han lubnganan.  Mababanhaw na liwat hiya ngan magpapabilin dida han mga sakramento han Singbahan: an bunyag, kompisal, Yukaristiya, konpirma, kasal, orden ug sakramento ha magsakit.

Pagampo:

Ginoo Jesucristo, kaurogan diri na nakikigbali ha imo an kalibutan.  Kundi dayuday ka nababanhaw.   Yana nga panahon han peste, nagaampo kami hin pagtambal han amon mga lawas, ngan nagpapasalamat kami ha hul-os nga kasingkasing han pagtambal han amon mga kalag nga ginhatag nimo ha Pasko han Pagkabanhaw.  An imo madinaugon nga gugma magpanalipod ug magpabaskog han mga frontliners dida han amon pakig-asdang supak han Covid-19.  Ini nga amon mga gin-aantos yana magdara unta ha amon ngada  hin hirohilarum pa nga paghigugma ha imo dida han imo Singbahan, ngada han imo mga sakramento.  Amen.

Amay Namon . . .
Maaram kami nga bisan ano an mahitabo, masarig an amon kabubuwason dida han imo mga kamot.

An Pagkamatay ni Jesus napapamatud-an han kasaysayan han kalibutan, kundi an iya Pagkabanbaw makakarawat la pinaagi hin pagtoo.  Magkalainlain an mga nahitabo tungod han iya Pagkabanhaw:  an kababayen’an nagkalilipay, hi Pedro napausa ug hi Juan nagdalagan ngadto han ginlubngan, an nagruhaduha nga Tomas nagkinahanglan hin karig-onan pinaagi hin pagkita han mga ginlagbasan han mga raysang ha mga kamot ug till ngan hin pagkapot hini ug an iya samad ha kagiliran.   Masasakit pa gihapon kita ngan mamamatay, kundi napukan na ini ni Jesus.  Pinagi han iya pagsakita, ginpapakita ha aton an dalan, gintututdoan kita han kamatuoran, ngan gintatagan kita niya hin kinabuhi nga dayon.

Nagsering hi Jesus ha iya mga tinun-an: “Ayaw kahadlok!”  An pakakita han nabanhaw nga Cristo nagpapamatuod han paglaum ug han kapawa kahuman han kasirom han pagsakita ug pagpataya ha iya.  An pakatagamtam han pagkabanhaw ha kada usa nga tinun-an nagparig-on han ira pagsantop nga waray makadaog an kamatayon ngan waray makapaundang han ira tinuod ug buhi nga pakig-usa han Ginoo.   An karat’an ug an kakurian diri gayud makakadaog supak han kaupayan ug paghigugma.

Pagkahuman han imo dalan han kros, nangangamuyo kami Ginoo, nga tutdoan mo kami hin pagbantay, kaupod an imo Nanay ug an kababayen’an nga waray bumaya ha imo tubtob ha Kalbaryo, ha pagpamulat han imo pagkabanhaw.  Ginoo Jesucristo, naatubang kami hin makuri ug masakit nga mga takna ha kinabuhi.  Umupod kami ha imo dida han imo Dalan han Kros, ha pagdumdum han imo sakripisyo. Yana nanginginyupo kami nga updan man kami nimo ha amon Dalan han Kros, basi mapun’an an amon kasingkasing han imo paghigugma.   Maaram kami nga bisan ano an mahitabo, masarig an amon kabubuwason dida han imo mga kamot. Dida han pagdarag’an han pagkabanhaw, gintagan nimo kami hin paglaum ug kusog. Hatagi hin pagtambal ug hin malaksi nga paghibalik ha maupay nga panlawas adton mga magsakit, panalipod ug kabaskog ngada han mga frontliners, lamrag ngada han mga naghihingita hin bulong, ngan katalwasan ug kamurayawan ngada han imo bungto.  Pinangangaro namon ini puno hin pagtapod ug pagpaubos.  Amen.