Maloloy’on ug mapuanguron nga Amay,
nagtutug-an kami han amon mga sala
ngan mapainubsanon nga nadaraon kami ha imo
pagpangaro hin pasaylo ug hin kinabuhi.
Nadaraon kami ha amon panginahanglan
han imo panalipod supak han virus Covid 19
nga nakadarahig ngan nakaawat na ngani hin mga kinabuhi.
Nangangamuyo kami yana nga siplatan kami nimo nga mahigugmaon
ngan pinaagi han imo nakakatambal nga kamot,
wad-a an kahadlok ha sakit ug kamatayon,
ibalik an paglaum ngan pakusga an pagtoo namon.
Nagaampo kami nga imo tugwayan an mga tawo
nga gintuinan hin pamiling hin mga bulong hini nga sakit
ngan pagpuypoy han iya pagtapon.
Bendisyoni an amon mga ungara hin pag gamit han mga bulong nga ginhimo
basi matapos na ini nga pandemya dinhi ha amon nasud.
Nanginginyupo kami
tungod han mga nanginginano bahin han maupay nga panlawas
basi magataman hira han mga magsakit inupdan hin pagkabatid ug pagpaid
Hatagi hira hin maupay nga panhunahuna ug panlawas,
hin kabaskog ha ira ginsumpaan, hin kapanalip’dan ha kasakitan.
Nangangmuyo kami tungod han mga magsakit.
mahibalik na dayon an ira maupay nga panlawas.
Panalipidi an mga naninimangno ha ira.
Pasudla ha dayon nga pahuway adton mga nagkamatay na.
Hatagi kami hin grasya yana nga takna hin kakurian
hin pagbuhat tungod han kaupayan han ngatanan
ngan hin pagbulig han mga nagkikinahanglan.
An amon mga panimangno ug pagpaid ha tagsa-tagsa
magdasig ha amon ha panahon hini nga pagsari
ngan magdara hin kabag-ohan ug kabaraan ha amon.
Pinaagi han amon Ginoo Jesucristo, imo Anak,
nga nabubuhi ug naghahahdi upod ha imo, dida ha pagkausa han Espiritu Santo,
Dyos ha dayon nga katuigan. Amen.
Ubos han imo panalipod nadaraon kami, O santos nga Iroy han Dyos;
ayaw igsalikway an amon mga pangamuyo ha amon mga panginahanglan
kundi dayuday gaw’sa kami ha mga karat’an,
O Birhen nga mahimayaon ug baraan. Amen.
O Mahal nga Señora, kinabuhi han magsinakitnon, igampo mo kami.
San Jose, igampo mo kami.
San Rafael Arkanghel, igampo mo kami
San Roque, igampo mo kami
San Lorenzo Ruiz, igampo mo kami
San Pedro Calungsod, igampo mo kami.