Mga kabugtuan ko, Pasko na liwat!
Magsasaurog kita han Pasko han pagkatawo ni Cristo ha luyo han aton mga kahadlok ug kabaraka. Pero an aton Ginoo amo an aton kapawa ug paglaum. Hiya an nagwawara han aton mga kabaraka. Hiya liwat an nahatag hin tinuod nga kalipay. Ini nga makuri nga panahon usa nga higayon para makatotok kita han Diyosnon nga Bata.
Nagpakatawo hiya para maghatag hin paglaom ug katalwasan ha aton. Hiya an aton kapawa samtang aanhi kita hin masirom nga kahimtang. Ug hiya liwat an nag-aaghat ha aton na hi kita magin kapawa ngadto han aton igkasitawo. Pinaagi han aton mga buhat hin gugma ug kalooy nagigin kapawa kita ha iba. Mag paangbit kita ngadto han mga nanginginahanglan labi na yana nga panahon.
Yana nga kapaskohan magkaurosa unta kita ug magburublig. Pinaagi hini makatalwas kita tikang hini nga kakurian nga aton gin aagi-an. Himuon naton an aton pagkaurosa ug pagburublig nga usa nga pamaagi hin pagpasangyaw han pulong ug gugma ni Cristo ngadto han ngatanan nga katawhan.
An aton pagtuo nga aton nakarawat 500 years ago, amo an naghahatag ha aton hin kadasig ug paglaom. Maipa angbit unta naton ini ha iba nga mga katawhan para han kadarayawan ug himaya han Diyos.
Maupay nga pasko ha iyo ngatanan!